أى أم فى الدنيا يهمها دايماً تختار الأفضل لأطفالها ومن أول وأهم وأصعب الاختيارات اللى بتقابلك كأم ومسئولة عن طفل هو اختيار الحضانة المناسبة.
بحكم شغلى فى مجال تصميم المناهج فى حضانة “علمني”، باهتم بكل حاجة بتخص الحضانة من أول نظام الفصل وتأهيل المدرسات لحد مساحته ونظافته والروتين اليومى للأطفال، لأن الحاجات دي كلها مع بعض هي اللى بتخلى أهداف المنهج تتحقق والأطفال فى الآخر يتعلموا إللي المفروض يتعلموه خلال فترة وجودهم في مرحلة الحضانة.
وعلشان كدة حبيت أقولك إيه هى أهم 3 حاجات محتاجة تعرفيها عن الحضانة قبل ما تقررى تدخلى إبنك فيها ،علشان تضمنى إن الساعات اللى بيقضيها طفلك بعيد عنك مفيدة وإنه كمان فى أمان ومبسوط .
أولاً: طفلك بيقضي وقت مفيد
وعلشان تعرفى هيكون مفيد إزاى محتاجة تسألى عن حاجتين:
- المنهج إللى الحضانة شغالة بيه.
ومش مهم يكون منهج ليه إسم معروف وعالمي، المهم إنه يكون له أهداف واضحة ومعلنة لأولياء الأمور وموضح الطفل هيبدأ من فين وهيوصل لفين.
- فلفسة المنهج ده (يعنى الطريقة إللي الأولاد بيتعلموا بيها شكلها إيه)
هل طريقتهم بتعتمد على التلقين والحفظ ولا على مشاركة الأطفال فى عملية التعلم؟ إعرفى حاجة مهمة أوى وهي إن الحفظ هيخلى ابنك يعدى امتحانات ويجيب أرقام هايلة فى الشهادة كل سنة لكن الفهم ومشاركته فى استنتاج المعلومة بتخليه بعد كدة عارف يعلم نفسه بنفسه وفاهم المعلومات إللى بيدرسها وعمره أبدا ما يناساها مهما مرعليها زمن ومهما اتحط تحت ضغط زى ما بيحصل مع طريقة الحفظ .
ثانياً: طفلك فى أمان
وهنا محتاجة تعرفى ٤ حاجات
- هل فى نظام فى الحضانة لاستلام وتسليم الأطفال ولا أى حد ممكن ييجى يستلم طفلك بدون علمك!
- هل فريق الحضانة مدرب على الإسعافات الأولية ؟ ويقدر لا قدر الله لو طفلك حصل له حاجه يسعفه؟ وهل الحضانة موفرة طبيب موجود بصفة دايمة؟
- الأمان كمان بيتمثل فى النظافة، هل الحضانة بتهتم بالنظافة فى المكان وفي الأكل إللى بتقدمه للأطفال ولا لأ، ومن حقك تطلبى تشوفى المطبخ وتعرفى نوعية الأكل اللى هيتقدم لطفلك.
- كمان مهم تسألى أمهات الأطفال الموجودة حالياً في الحضانة عن المدرسات والمشرفات، هل حد منهم بيتعامل وحش مع الأطفال وهل فى شكوى معينة من أى حد ممكن تأثر على أمان طفلك فى الحضانة؟
ثالثاً: طفلك مبسوط
بعد ما اطمنتى إنه هيكون بيتعلم حاجة مفيدة وهيكون فى أمان، مهم جدا إنك تتأكدى إن طفلك هيكون مرتاح نفسياً فى الحضانة دى.
وتقدرى تعرفى ده بطريقتين :
- إنك تزورى الحضانة وتشوفى الأطفال الموجودة مبسوطة ولا لأ ، وتسألى كمان الأمهات عن علاقة أطفالهم بالحضانة وفريق العمل بيها.
- والحاجة الثانية إنك ممكن تودي طفلك فترة الصيف مثلاً عشان يجرب الحضانة وتقدرى تحكمى بعدها إذا كان هيبقى مبسوط ولا لأ.
وفى النهاية طبعاً في حاجات كتير أوى ممكن تختارى الحضانة على أساسها، زى سعرها وقربها من البيت ومواعيدها وإذا كانت بتوفر مواصلات ، لكن أنا قولتلك الحاجات إللى لو إنتى كأم لأول مرة بتختار لطفلها حضانة ممكن متاخديش بالك منها ومن أهميتها.
شاركينا إنتى كمان بحاجات تانى بتهمك وإنتى بتدورى على حضانة لطفلك.