سلسلة مقالات قصيرة عن التربية في ظروف الكورونا
الفترة دي احنا بتعامل مع مرحلة جديدة علينا وعلى أولادنا، السلسلة دي ممكن تساعدنا في التربية في الظروف دي، وهتفيدنا بشكل عام في التعامل مع الأطفال في الأوقات الصعبة.
الخطوة الأولى:
اتعامل إزاي لو ولادي قلقانين من اللي بيحصل؟
١. أسمعهم وأوريهم إني متفهمة قلقهم: شيء طبيعي إنهم يقلقوا، وفي حاجات كتير هتقلقهم في حياتهم... ولما يلاقوا حد بيسمعهم ويفهمهم هيتشجعوا إنهم يتكلموا دايمًا على مشاعرهم ويدوروا على مساعدة لما يحتاجوا. ممكن نقوللهم كلام زي: " أنا عارفة إنها حاجة غريبة وتقلق "، " أنا كمان قلقانة شوية "، " أنا عارفة إنك طبعًا زهقت اوي "، "حاجة صعبة إننا نبقي في حاجة مش عارفين هتخلص امتى". ده هيطمنهم إن إحساسهم عادي ويساعدهم يفهموا مشاعرهم ويعبروا عنها.
٢. لو هما مبيتكلموش في الموضوع أفتحه أنا: أسألهم إحساسهم ايه أو أتكلم معاهم أنا عن إحساسي، من غير ما أبالغ ولا أقلقهم، عشان افتح الباب ليهم لما يبقوا جاهزين.
٣. أطمنهم إنهم في أمان، مش محتاجة أدي وعود بس هما عايزين يطمننوا ويتأكدوا إن في حد مسئول عن أمانهم وسلامتهم، ف نفكرهم إننا واخدين احتياطاتنا على أد ما نقدر وإننا عمرنا ما هنحطهم في وضع في خطورة عليهم.
٤. هما أكيد يعرفوا معلومات عن الموضوع دلوقتي، بس دايمًا هيكون عنده أسئلة، نجاوب عليها كلها ببساطة وعلى أد السؤال من غير ما نكذب ولا نخاوفهم، فمثلاً لو سألت: "لو حد جاله كورونا هيحصله إيه؟" نقول حاجة زي "هيجيله دور برد بس جامد شوية"، وهكذا. ولو مش عارفين نقوللهم تعالوا ندور مع بعض على الإجابة.
٥. نبعدهم أو نحد من رؤيتهم وسماعهم للأخبار، لإنها ممكن توترهم جامد من غير داعي، ونتكلم معاهم عن أي حاجة بيشوفوها ويسمعوها.
٦. نعملهم روتين ليومهم في مساحة للمرونة، ونديهم اختيارات على أد ما نقدر عن يومهم ووقتهم، هما حاسين إنهم بشكل ما فقدوا السيطرة على حاجات كتير في حياتهم وده بيوترهم، الروتين بيديهم إحساس بالأمان، والاختيارات هتعوضهم عن جزء من اللي فقدوه.
٧. أقترح عليهم حاجات يعملوها لما يحسوا إنهم قلقانين، زي إنهم يجوا يتلكلموا معايا، أعلمهم تمارين تنفس، يجوا يقعدوا في حضني، يدعوا أو يصلوا، وممكن يرسموا أو يكتبوا أو يمثلوا اللي حاسين بيه.
مي علوي