أعزائي المعلمين والمعلمات
تحية طيبة وبعد،
من غير كلام كتير وبدون مقدمات، عاوزة أقولكم على حاجة:
أنا مش حصة فاضية بلا هدف ولا اتوجدت علشان تخلصوا فيها المنهج المتأخر، أنا حصة ليها حقوق ومفيش فرق بيني وبين حصة العربي والحساب والإنجليزي أوالعلوم…كلنا لينا نفس الأهمية، أيييوة ..نفس الأهمية بالظبط.
سامعة حد بيسأل "ليه يعني ؟"
أقوللكم، زي ما مدرس العربي والعلوم عليهم حمل كبير ودورهم عظيم ومهم في بناء الجزء المعرفي عند التلاميذ، مدرس الألعاب والموسيقى والتربية الفنية مسؤولين عن صحة الأولاد النفسية والبدنية و في الآخر زي ما الإنسان له عقل محتاج يتغذى فهو عنده روح وجسد محتاجين غذائهم هما كمان، وإلا هنطلع أشخاص غير أسوياء.
لو هدفنا من التعليم إننا نطلع مكن يشتغل كويس لكن مايحسش ولا يبدع فأنا معاكم لو قولتوا إني ماليش لازمة ، لكن لو هدفنا نربي إنسان مكتمل العقل والجسد، متزن العاطفة و مكتمل الروح والهوية، فالالتزام بحصتي لازم يكون من الأولويات.
بعض مدرسين المواد الأساسية بيشوفوني مجرد حصة الولاد بيشموا نفسهم فيها شوية بعيدا عن الواجبات والامتحانات والكتابة والحفظ ، وده حقيقي ومهم، لكن اللي نفسي ألفت نظركم ليه هو إني ممكن أساعدكم وأسهل عليكم مهمتكم في تدريس المواد الأساسية بتاعتكم.
ناخد مثال صغير: حصة الألعاب مثلا، الحصة دي من أهم الحصص في اليوم عند الأولاد عشان لعب الكورة والجري والتنطيط والحصة دي فرصة عظيمة للمدرسين إنهم يشاركوا الأولاد فرحتهم ويخلوهم يشوفوا وش تاني للمدرس غير الوش التقليدي بتاع “ركز في الدرس”، و”فين الواجب؟” و”عندكوا امتحان بكرة”…الطالب بيقدر يشوف الشخصية الحقيقية لكل معلم ومعلمة بكل الحلو اللي مش بيشوفه في الحصة العادية وبيحس بمشاركتهم له وانبساطهم معاه وضحكتهم من قلبهم وبالتالي بتتكون بينكم رابطة قوية.
أنا كحصة نشاط حابة أقولكم إني أعرف مدرسين عندهم مشاكل ضخمة مع بعض الفصول والطلبة وصعوبة في السيطرة على سلوكهم وتوجيههم وكل المشاكل دي ممكن يكون حلها حصتين ألعاب ينزل المدرس فيهم يلعب مع الطلبة.
برضو سامعة حد بيقول “هو أنا عندي وقت أنزل ألعب كمان مع الطلبة؟ مش كفاية التحضير والحصص والتصحيح والشغل اللي مش بيخلص؟!”
أكيد الوقت اللي حتستغله في اللعب مع الأولاد حيكون من وقت حاجة تانية، بس صدقني حيوفر عليك وقت كبير أوي كنت بتضيعه في الحصة في تسكيت الأولاد ومحاولة لفت انتباههم للدرس، وفي الأول والآخر مستوى الأولاد ونتايجهم آخر السنة في وشك انت.
مثال تاني صغير وهو حصة التربية الفنية.
طبعا البعض فاكر إن حصة التربية الفنية هي الرسم وخلاص وده تصور خاطئ جدا الحقيقة، لإن إسمها: التربية الفنية، يعني هدفها الرئيسي رفع الذوق العام عند التلاميذ، الذوق في الكلام والذوق في اللبس والحس الجمالي والاستمتاع بالحاجة الجميلة والتعبيرعنها كمان.
لو مدرسة الحساب أخدت الفصل ونزلوا على أوضة التربية الفنية وابتدوا يفننوا مع بعض شوية في حاجة ليها علاقة بالأشكال الهندسية مثلاً، البنات هيفهموا الدرس بشكل أقوى و هيستمتعوا وكمان هتساهمي في تربية الحس الجمالي عندهم وربطه في دماغهم بالعلم، وممكن تلاقي أفكار تانية هنا.
تخيلوا معايا طالبة بتعرف تشوف الجمال في اللي حواليها، بتعرف تعبر عن اللي جواها من غير خوف وترقب، أكيد مستوى استيعابها للمواد العلمية التانية حيكون أفضل من غيرها.
الخلاصة عشان مطولش عليكوا أعزائي المعلمين والمعلمات ، أنا مقدرة مجهودكم تماما ومتأكدة إنكم لو استغلتوني أكتر من كدة شوية أو جيتوا تزوروني مع الأولاد ، حتستمتعوا أوي وحتزيلوا حواجز كتير أوي محطوطة بينكم وبين الطلبة بتوعكم وحتشوفوا الفرق في الحصص بتاعتكم وفي سلوك الأولاد معاكم إن شاء الله، انتوا مسؤولين عن تربية إنسان مش طالب؛ إنسان له روح وجسد وعقل عشان تطلعوا أجيال متزنة فاهمة نفسها كويس وعارفة هي بتحب إيه وشاطرة في إيه.
إمضاء
حصة نشاط بتحبكم