“يا رب الورق يموت” أمنية بيتمناها كل اللي اتضطرتهم الحياة  إنهم يكونوا من المصححين.

كنا نحب طبعاً إن البوست ده يكشفلكم عن فوائد التصحيح  للصحة العامة ويفاجئكم بمزايا القعدة بالساعات قدام الورق بالقلم الأحمرعشان يهون عليكم، لكن للأسف مفيش حاجة إسمها كدة والتصحيح هيفضل طول عمره شر لابد منه،بس بالرغم من كدة،في حاجات كتير تتعمل ممكن تهون عليكم  التعامل مع الأكوام اللا نهائية من ورق الامتحانات اللي على مكاتبكم وكراسيكم وفي شنطكم وفي كل حتة في الفترة دي، إليكم أيها المدرسين الأبطال الأعزاء بعض النصائح اللي ممكن تلطف من تجربة التصحيح وتخليها أقل تلفاً بأعصابكم.

١. قسم أكوام الورق إلي أجزاء صغيرة وكافئ نفسك بعد الانتهاء من كل جزء

لما تشوف قدامك كومة من ٥٠٠ ورقة غير لما تشوف رزمة ٢٥ ورقة و تبقى عارف بعدها إنك هتاخد استراحة قصيرة، إضحك على نفسك مايجراش حاجة لأن الموضوع ده فعلاً بينجز.

٢. صحح نفس السؤال في كل الورق

الأحسن من إنك تمسك ورقة من أولها لآخرها إنك تصحح نفس السؤال في كل الورق، لأن عينك هتقدر تشوف الصح والغلط بطريقة أسرع وهتخلص بدري.

٣. إبدأ بالأسئلة اللي إجاباتها محددة

مش لازم نبتدي بأول سؤال وتمشي بالترتيب، هتحس بالإنجازأكتر لما تبتدي بسؤال الصح وغلط مثلاً أو سؤال الاختيارات وتخلصه في كل الورق.

٤. جهز ترمس قهوة توفيرا للوقت

وقت التصحيح المدرسين بيعيشوا على الشاي والقهوة، وعلشان ماتقطعش تركيزك جهز كمية من القهوة أو الشاي تكفيك كذا ساعة علشان ماتضطرش تقوم كل شوية وتفقد تركيزك.

٥. إبعد عن أي حاجة تشتت انتباهك

ثبت العلم إننا بنحتاج نص ساعة تقريباً عشان نرجع لنفس درجة تركيزنا بعد ما حاجة تقاطعنا. لو في دوشة حواليك أو ناس بتقاطعك، الأحسن إنك تعزل نفسك وتقفل الانترنت وتشغل خاصية الصامت في تليفونك .

٦. شغل مزيكا

ثبت العلم برضو إن الموسيقى بتساعد على التركيز وقت الشغل وخصوصاً الموسيقى الكلاسيكية، ولكن لو إنتي مش من هواتها، شغلي موسيقى هادية من اللي بتحبيها.

٧. خلي عين تانية تراجع تصحيحك

لو بتصلح مع مجموعة، راجعوا تصحيح بعض ، هتوفروا وقت وفرص الخطأ هتقل.