كتير بنبقى عايزين نعمل أنشطة لأولادنا لكن يا إما مش بتكون الأدوات المطلوبة متاحة وبيبقى صعب النزول، أو مش بنقدر نخصص ميزانية دورية لعمل أنشطة للأولاد. عشان كدة هنتعلم طريقة عمل كذا نشاط من غير أي تكلفة خالص و بإستخدام ۳ أدوات موجودة في أي بيت.
١-العفش
سباق حواجز: هو إننا المفروض نعدي الحواجز المحطوطة. أفكار للحواجز:
- الزحف تحت نفق معمول بالكراسي.
- النط بالشوال، بإستخدام أكياس مخدات. بيحطوا رجليهم فيها وبينطوا لحد النقطة المُحددة.
- المشي على إيدهم ورجليهم.
- التوازن على المخدات: بترص المخدات قدام بعض، والمطلوب التحرك من مخدة للتانية من غير ما رجلينا تلمس الأرض أو نسند على حاجة، يا إما بنعيد من الأول.
ملعب تنس:
- هتحط كرسي وقصاده الناحية التانية كرسي تاني.
- بعدين تعلق بين الكرسيين الشبكة. ممكن تعملها بحبل (لو عندك)، أو ممكن تربط إيشربات أو لبس في بعض أو تستخدم ملاية. لما تبقى الشبكة جاهزة، اربط كل طرف عند كرسي.
- هتجيب كذا ورقة أو كيس بلاستيك وتكرمشهم في بعض وبقى عندك كورة.
- وللمضرب، ممكن تستخدم أطباق بلاستيك أو غطيان علب بلاستيك.
وبقى عندك ملعب تنس 😊
التسلل:
- هتجيب كرسي وتحط تحته أي حاجة (مفتاح، لعبة، كتاب... إلخ)
- حد هيقعد على الكرسي مغمي عينيه.
- الباقي هيزحفوا ويحاولوا يجيبوا الشئ اللي تحت الكرسي من غير ما الشخص اللي مغمي عنيه يلمسهم.
٢-الملايات
التوازن:
- واحد هيقعد على الملاية ماسك فإيده طبق بلاستيك مُسطح وعليه كورة (زي ما اتفقنا، ممكن نعمل الكورة بورق أو أكياس بلاستيك)
- واحد تاني المفروض يسحب الملاية لحد مسافة مُعينة من غير ما الكورة تقع من الطبق.
- ممنوع لمس الكورة بالإيد أو الوش.
- لما يخلصوا، يبدلوا أدوار.
- ممكن تحددوا مجموع واللي هيوصله هو الفايز.
احفظ وقول:
- هتجيب أكبر عدد من الأدوات اللي تقدر تحطها تحت الملاية (كل ما كانت الحاجات أصغر و أكتر كل ما كانت اللعبة أصعب)
- هتشيل الملاية وتسيب لهم كذا ثانية يحاولوا يحفظوا فيها الحاجة اللي تحت الملاية.
- بعدين، تغطيها، وتديهم ٣٠ ثانية يقولوا أكبر عدد من الحاجات اللي تحت الملاية.
- ممكن تلعبوها مرة وممكن تلعبوا كذا دور بنقط ويبقى في فايز فالآخر.
خيمة: كلنا عملنا خيم وإحنا صغيرين. خلي ولادك يعملوا خيمة بإستخدام الملايات والكراسي و يزينوها بإستخدام الإدوات المتاحة في البيت. وممكن كمان يبيتوا فيها كنوع من كسر الروتين 😊
٣-الشماعات
فك العُقدة:
- شبك شماعات في بعض (كل ما زاد عدد الشماعات، كل ما زاد مستوى الصعوبة)
- اطلب منهم يفكوا العُقدة.
- ممكن تعملها مراحل بوقت مُعين وكل لما يعدوا مرحلة تزود مستوى الصعوبة.
التنشين:
- علق شماعة في نجفة او أي حاجة (زي ما قلنا الحبل ممكن يتعمل بإيشاربات أو لبس)
- اعمل كور صغيرة بأي عدد أنت عايزه أو ممكن تستخدم أدوات أو لعب صغيرة عندك متكنش بتتكسر.
- المطلوب هو الوقوف عن بُعد من الشماعة المُعلقة والتنشين بحيث الكور أو الأدوات تدخل في فتحة الشماعة.
كل الألعاب اللي فاتت مش بس ممكن ولادك يلعبوها، دول كمان ممكن يعملوها بنفسهم، وأحلى حاجة فيها إن تكلفتها صفر. عايزة أقول حاجة مهمة: بطلوا جلد الذات! زي ما إحنا مطالبين إننا نلعب ونقضي وقت مع أولادنا لإن ده بيأثر بالإيجاب على صحتهم النفسية، إحنا برضه مش مطالبين إننا نقضي "كل الوقت" معاهم. ده أصلاً مش صحي لهم. هم محتاجين يقضوا وقت يلعبوا فيه لوحدهم أو مع بعض بدون تتدخل مننا، وده بينمي مهاراتهم الإجتماعية ومهارات تانية كتير زي الإعتماد على النفس وحل المشكلات واتخاذ القرارات والإبداع... إلخ. الفكرة فقيمة الوقت اللي بنقضيه معاهم، مش في كميته... دمتم بعافية 💙