فى عيد الام كل المدرسات بتدور على أفكار لهدايا عيد الأم غير الكروت المعتادة ، وعلشان كدة جبنالكم 3 اقتراحات حلوة ومختلفة لهدايا من صنع الأطفال وبتكاليف بسيطة جدا.
١. بوكيه قرنفل من المناديل
موقع mainlyhomemade.com عنده فكرة حلوة أوي لعمل ورد بسيط وشكله حلو من مناديل الكليينكس.
هتحتاجوا مناديل مربعة وبنسة شعر وأقلام فلوماستر بسن سميك أو ماركر ملونة.
الخطوات:
- حطوا ٣ مناديل فوق بعض على سطح مستوي واتأكدوا إنهم متساويين فوق بعض
- طبقوا المناديل على هيئة مروحة واشبكوها من النص ببنسة شعر
- اقطعوا أطراف المروحة بإيديكم وبعدين ضموا الطرفين لبعض واظبطوا البنسة بحيث تكون في النص بالظبط
- لإضافة اللون، حطوا الماركر على أطراف المروحة وسيبوه شوية لحد ماينزل لون على الأطراف كلها
- إفردوا المروحة وافصلوا الطبقات عن بعض
- حطوا البنسة في شاليموه أخضر عشان يكون ساق القرنفلة
وبكدة هتكونوا عملتوا ورد شكله مختلف وبأبسط الموارد والتكاليف.
٢. خاتم أو حلق زرار
دي فكرة جهنمية اتعلمتها من واحدة صاحبتي بتلبس حلقان جميلة بتكلفها عشرة أو خمستاشر جنيه بالكتير 🙂
اللي هتجتاجوه : زرادية وغراء قوي وزراير شكلها حلو وحلقة للخاتم أو بريمة أو مشبك حلق سادة من عند الخردواتي اللي هتجيبوا منه الزراير.
- قصوا أي زيادات في الزرار علشان يكون مسطح من ظهره
- الزقوه بالغراء على الخاتم أو الكليبس أو البريمة وسيبوا الغراء ينشف
لا يمكن حد هياخد باله إن الحلق الجميل ده أصلا زرار والأولاد هيفرحوا لما يشوفوا مامتهم بتلبس الهدية اللي عملوها بإيديهم:)
٣. دلايات من عجينة السيراميك
هى عجينة شبه الصلصال لكن بعد ما بنشكلها بنسيبها تنشف وتفضل على نفس الشكل اللى عملناه
وممكن نعمل منها افكار تانية غير الدلايات للميدالية أو السلسلو، ممكن يتعمل علبة لحفظ الاكسسوارات او خرز ونعمل منه عقد جميل.
طريقة عملها سهلة جدا بس هتحتاجوا تجيبوا كام حاجة وتحضريها في مطبخ قبل ما تاخديها للأطفال يشتغلوا بيها.
هتحتاجي نشا وغراء ابيض وزيت برافين و زيت او كريم فازلين و كريم سوفت أى نوع موجود عندك ف البيت و (طاسة) مقلاية و ملعقة خشب وأى نوع ألوان سائلة وممكن تضيفى ملعقة ملح صغيرة فى حالة انك هتستخدمى اى نوع زيت بديل لزيت البرافين زى مثلا زيت طعام وده علشان الملح يحافظ على العجينة من الفساد وإن كنا نفضل زيت البرافين لأنة بيحافظ على العجينة لمدة اكبر وبدون الحفظ فى الثلاجة وكمان بيخليها لينة اكتر
الخطوات:
- ضيفى معلقة صغيرة من زيت البرافين + معلقة من زيت الفازلين فى الطاسة ولو مش متاح الاثنين ممكن تستخدمى زيت البشرة العادى اللى بنستخدمه للأطفال
- ضيفى مقدار نشا الى الزيت اللى ف الطاسة وعليه مقدار غراء بمعنى انهم بيكونوا نفس الكمية بالظبط
- قلبيهم كويس بالمعلقة الخشب على نار هادية جدا لحد مايبقوا عجينة متماسكة ومش لازقة ف الطاسة (جربتها مرة من غير نار وكانت كويسة برضه)
- إدهنى إيدك والمكان اللى هتشتغلى عليه بالعجينة اذا كان رخامة المطبخ او ترابيزة او صينية بالكريم المرطب كويس جدا ودلكى العجينة كويس بايدك لحد ماتبقى مرنة وشبه الصلصال
- قسمى العجينة الى أجزاء وضيفى على كل جزء لون من الألوان السائلة ودلكيها باللون لحد ما يتغير لونها تماما
ودلوقتى تقدرى تاخديها معاكي المدرسة وتديها للأطفال عشان يشكلوا بيها اللي هما عايزينه.