عندنا في علمني في نشاط إسمه “شكمجية الذكريات” واللي  فيه كل معلم بيتكلم فيه عن حد من معلمينه أثر فيه وفي تكوينه على مدار حياته، بيحاول يستحضره معاه ويحكيلنا عنه ويتكلم بإسمه وطريقته.. بنحاول نفتكر قد إيه إنسان ساعد غيره أنه يكون أحسن على مدار سنين حياته، ويأثر كمان في الناس اللي بيتعامل معاهم الشخص ده حتى لو مشافهمش ولا شافهوه قبل كده.. حتى لو كان مش موجود في الدنيا دلوقتي بس لسة أثره موجود وبيأثر في غيره وبيكلم الناس عنه وبيلهمنا بالتجربة.

دايما بتخيل الولاد في علمني لما يكبروا ويتكلموا عن معلميهم.. بسأل نفسي يا ترى إيه التأثير اللي ممكن يكون حصل معاهم، وياترى هيكون كل حد من المعلمين ساهم إزاي في حياة الطفل ده لما يكبر وفي دايرة الناس اللي بيتعامل معاهم، وعشان كدة قررت أعمل مقابلات مع الأطفال وجهاً لوجه أسألهم عن كل حاجة  ودي كانت إجاباتهم:

إيه أكتر حاجة بتحبها في المدرسة؟

هاجر 12 سنة، طالبة بالصف الثاني الابتدائي قالت ” أصحابي لأننا بنلعب مع بعض في وقت الراحة، والتعليم لأنه بيساعدني يبقى جوايا حاجات أحلى كثير خصوصا إني مكنتش بعرف لا أقرا ولا أكتب ودلوقتي بقيت بعرف ولسة بتعلم أكثر، علشان كدة نفسي المدرسة تكون مستمرة على طول ومناخدش أجازة لمدة طويلة لأني بحب المدرسة”. أما عبد الرحمن، 12 سنة ،في ثانية ابتدائي فقاللي "طريقة التعليم والمدرسين لأنهم  بيحترمونا ولأننا بنتعلم من غير زعيق والتعامل بيكون بالقواعد والقوانين اللي بنتفق عليها.” وهدى، 12 سنة، برضو معاهم في تانية ابتدائي قالت “ المدرسين لأنهم بيحبونا وبيعاملوانا كويس، وبيساعدونا نتعلم كويس” هدى كمان قالت إن “السنة دي أول سنة لي في علمني ودي أول سنة أعرف أقرا وأكتب فيها رغم إني كنت في مدرسة ثانية قبل كدة بس مكنتش لسة بعرف أقرأ وأكتب."

مين المدرس اللي أثر فيك؟ وأثر فيك إزاي؟

جنى، ٩ سنين، في تانية ابتدائي  قالت “مس مروة لما علمتنا دورة حياة  الفراشة بأغنية ورقصة كنا بنرقصها عليها، وعملناها في عرض آخر السنة كنا مبسوطين وإحنا بنعمله. كمان هي بتهتم بشكلها وبتلبس حلو، وبتخليني آخد بالي أنظم لبسي ويكون نظيف زيها.”

أما هاجرقالت "مس هند لأنها بتعتذر لنا لو غلطت من غير ما تقصد، ومش بتزعق لحد، وبتشكرنا لما بنعمل حاجة كويسة." وعبد الرحمن قال "مس زهرة بتعلم الحساب بطريقة مختلقة، وبنلعب واحنا بنتعلم، وبتحترمنا وبتتكلم معانا بالراحة حتى  لو مش فاهمين."

أما هدى، فقالت إن كل مدرسة درستلها أثرت فيها بشكل مختلف: "مس زهرة علمتني أحافظ على الموارد بتاعة المدرسة، وإن كل الأدوات الموجودة في المدرسة مواردنا كلنا ومحتاجين نحافظ عليها.كمان بتتعامل معانا بطريقة كويسة ولما بنعمل حاجة غلط بتتناقش معانا وبتخلينا نقيم التصرفات اللي بنعملها بنفسنا. ومس ولاء بتقعد معايا وقت زيادة تشرح لي فيه لوحدي بعد الحصة، ولو احتاجت منها حاجة بتتكلم معايا. كمان بتعجبني طريقة كلامها وبتعلم منها طريقة نطق الإنجليزي الصح. مس هند بتكرر الشرح أكثر من مرة وتقسم الدرس على أكثر من يوم، كمان بتفهمنا المهام المطلوبة مننا قبل ما نعملها وتتأكد إننا فاهمين المطلوب مننا قبل ما نعمله.وهي  كمان لطيفة معانا وبتحس باللي إحنا بنحس به.. لما كنت ناقصة درجات في مرة وكنت زعلانة اتكلمت معايا و طمنتني إنه مش هيأثر عليا قوي في الدرجات وفهمتني الغلطات اللي كنت غلطتها، وكانت بتتابع معاياواتبسطت قوي لما لقيتني عملت كويس في الإمتحان اللي بعده خصوصا الحاجات اللي كنت بغلط فيها قبل كده. ومس حنان بتراجع لنا كل يوم على الدروس اللي فاتت قبل ما ناخد الدرس الجديد. بحس أنها بتقدرنا وبتسامح وبتصبر معانا حتى لو حد ضايقها، وده لاحظته لما حد من زمايلي ضايقها مرة بالكلام واعتذرلها بعد كدة فاتكلمت معاه علشان توضح له الصح وسامحته."

أكثر حاجة بتحبها فيه أو فيها؟

جنى قالت "مس مروة بتساعدنا نعرف حاجات جديدة بطريقة مرحة معانا، و بتتكلم معانا بصوت هادي.. علشان كده بحبها قوي وبحب أكتب لها جوابات.” أما هاجر فقالت إنها بتحب مس مروة لأنها بتخليها تساعدها في الحصة وبتعاملها كويس. وعبد الرحمن قال ” أكتر حاجة بحبها في مس زهرة إنها بتحترمنا وبتحترم كل اللي بيشتغلوا في المدرسة حتى الأصغر والأكبر منها."

اتعلمت/ي إيه من الميسر/ة ونفسك تتعلم/ي منها إيه؟

هاجر: إني أعتذر وماأضربش أو أضايق حد بالكلام حتى لو ضايقني، وأوضح  له بطريقة كويسة أن ده بيضايقني وميعملهوش معايا، ونفسي اتعلم من مس زهرة ومستر محمد الفن، لأنهم بيرسمواوبيصمموا مشاريع بشكل حلو قوي، وده حببني جدا في الفن ونفسي أتعلمه.

هدي: اتعلمت من مس هند الإحترام والرفق لما كانت بتشرح لنا قيم علمني، ولأنها بتحترمنا و وبتتكلم معانا بلطف.. وده خلاني أفكر قبل ما آخد موقف فيه من حد ضايقني بأنني أوضح له أني مش بحب التصرفات دي وأطلب منه يوقفها فورا وأني أعبر عن ده بطريقة كويسة.

قمر: الاحترام والمثابرة لما كانوا بيشرحولنا  قيم علمني .. وأننا نحترم بعض ونحترم اختلافنا ، وأننا نفضل نحاول لحد ما نوصل للي إحنا عايزينه حتى لو كنا تعبانين. نفسي أتعلم الصبر والتعامل بطريقة كويسة مع الناس لأن طريقتهم في التعامل معانا واهتمامهم بتفرحني وده مخليني نفسي أتعلم ازاي أفرح غيري وأساعده زيهم.

لو هتطلب منه أو منها حاجة هتطلب إيه؟

جنى: يحددوا الأسئلة اللي ممكن نسألها وإجابتها قبل الحصص، ويدرسولنا وقت أكثر

قمر: أنهم يقعدوا معانا وقت أطول.. ويتكلموا معانا في مواضيع كثير غير الدراسة.

هاجر: إنهم يكونوا معانا وقت أكثر، وميسيبوناش.

عبد الرحمن: أنهم يطلبوا مني المساعدة لو في حاجة أقدر أعملها، وإني أعلمهم او أعلم زمايلي الحاجات اللي بعرف أعملها كويس زي النجارة والألوميتال وأعمل ورشة عمل تساعدهم يتعلموا تصليح الأدوات والأبواب والشبابيك وان ده أكيد هيساعدهم يعملوا الحاجة بنفسهم وبفلوس أقل.

ايه اللي ممكن  الميسرين يتعلموه من الميسر أو الميسرة اللي بتحبوهم؟

جنى: إزاي يعملوا نشاط نتعلم منه واحنا مبسوطين زي مس زهرة، وأنهم يخصصوا وقت نتكلم فيه عن حياتنا غير وقت شرح الدرس العادي.

قمر: الرفق والاهتمام بالغير من غير عنف.

هاجر: يتعلموا من مس مروة تنظيم الفصل وطريقة تنفيذ الأنشطة معانا لأنها بتخلينا مبسوطين وبنحترم القواعد واحنا بنشتغل.

عبد الرحمن: إزاي تشرح بطريقة ممتعة وباللعب، وكمان ممكن كل مدرس مادة يشرح للمدرس الثاني المادة بتاعته علشان يكون بيعرفها كويس، زي إن مدرسين الإنجليزي يعلموا مدرسين العربي الإنجليزي علشان يكونوا بيعرفوا يتكلموا إنجليزي كويس زيهم، وكمان مدرسين العربي يعلموا باقي المدرسين اللغة العربية الفصحى ويفهموها كويس.

ولما سألتهم تحبوا تقولولهم إيه، كلهم عبروا عن حبهم و شكرهم وعن امتنانهم لكل الميسرات على مساعدتهم ليهم.

سمر رأفت