اتكلمنا في المقالة اللي فاتت عن أهمية الوعى بالذات وعن الشخصيات اللي عايشة جوانا وبتظهر في حياتنا اليومية حسب المواقف، واتعلمنا كمان إزاى نختار الشخصية اللي تتناسب مع الموقف اللي إحنا فيه.
النهاردة هنتعلم طريقة تانية تساعدنا نعرف نفسنا كويس من خلال مرايتنا ومراية الآخرين.
تعالوا نشوف إزاى هنعمل ده:
الخطوة الأولى: المراية الشخصية
هات ورقة وقلم واقسم الورقة نصين، اكتب فى النص الأول الصفات الإيجابية اللي شايفها في نفسك، والنص الثانى الصفات اللي محتاج تغيرها أو تعدلها.
طيب ممكن حد يقولى أنا مش هعرف، أو ممكن أخدع نفسى، أو شايف نفسى حلو قوى وماعنديش حاجة عايز أغيرها، وحد تاني ممكن يقوللي أنا شايف نفسى وحش خالص ومافياش أي ميزة.
علشان كده الخطوة دي مهمة جدا بس مش هنعتمد عليها لوحدها لأن ممكن تكون مرايتى خداعة ومزيفة وتخلينى أشوف نفسي بشكل تاني خالص غير الحقيقة وأفضل عايش فى وهم، وهنا ييجي دور الخطوة التانية.
الخطوة التانية: أنت فى عيون الآخرين
بس مين هم الآخرين دول؟ هم ناس بثق فى رأيهم، ناس مخلصة، وبتحبنى، ومش هتجاملني لمصلحة شخصية، وأكيد الناس دول موجودين حوالينا (ابنك – بنتك – زوجتك – صديقك) وعلى فكرة ممكن يكونوا كل الناس دي وممكن تستعين بيهم كلهم وهقولك ليه.
هتطلب منهم يعملوا نفس اللي انت عملته فى الخطوة الأولى، يعنى هيكتبوا الصفات الإيجابية اللي موجودة فيك والصفات اللي محتاج تعدلها أو تغيرها وطبعا ده هيساعدك لأن الصفات اللي هيجتمعوا عليها أكيد هتعبر أكترعن ذاتك الحقيقية.
الخطوة التالتة: الأربع مربعات
حط الورق كله قدامك وهات ورقة فاضية وقسمها لأربع مربعات:
المربع الأول : ( أنا أعرف ) اكتب فيه الصفات اللي انت بس تعرفها عن نفسك وماحدش كتبها خالص.
المربع التانى : ( هم يعرفون ) الصفات اللي هما كتبوها عنك وانت ماكنتش شايفها فيك أو ماتعرفهاش عن نفسك.
المربع الثالث : ( أنا وهم ) الصفات اللي أنتم الإتنين إتفقتوا على وجودها فيك.
المربع الرابع : ( المجهول) هتسيبه فاضى لأن دي الصفات اللي انت والآخرين ماتعرفوهاش، وعلشان تعرفها محتاج معالج نفسى يفك الطلاسم ويكشف المستخبي وعلماء النفس مسمينها المنطقة العمياء.
الخطوة الرابعة: شوف النقاط المشتركة
حلل المربع الثالث وشوف إيه الصفات الحلوة اللي اتفقتوا عليها وإيه الصفات اللي محتاج تغيرها أو تعدلها وحاول تحط خطة للتغيير، ولو مش هتعرف حاول تستعين بحد تثق فيه يساعدك ويحفزك.
حاول تنفذ الخطوات دي وممكن تتفق مع مجموعة من المقربين لك وتنفذوها مع بعض علشان تساندوا وتحفزوا بعض.
وبكده هتقدر تبص فى المراية وتشوف ذاتك الحقيقية الواضحة مش المزيفة.
مع خالص أمنياتى لك بالوعى بذاتك الحقيقية.
وانتظرونا المقالة الجاية ومفاتيح القلوب.
عزة محمد سليمان