علمني عندها ٤ قيم أساسية بتطبقهم في المؤسسة. القيم دي هي تمكين الأحلام والمسئولية والمرح والتعلم التكيفي. و عشان إنتم جزء من مجتمع علمني، قررنا نحول القيم دي لأنشطة عشان تعلموها لأولادكم في البيت. قمنا بالتعاون مع Peekabook اللي هتاخد كل قيمة وهتقلبها لأنشطة تتعمل على مدار ٥ أو ٧ أيام. هدف الأنشطة هو فهم القيم ومناقشتها وممارستها في الحياة اليومية. الفئة العمرية اللي هنستهدفها الفترة دي هم الأطفال من سن ٤ لـ ٦ سنوات.
المسئولية
(اليوم الثالث)
المدة: 30 دقيقة
الموقع: أي مكان
مستوى النشاط: هادئ
الفئة العُمرية: 4 – 6
الأدوات: لا شئ
إيه هي المسئولية؟
المسئولية هي إننا ناخد بالنا إحنا بنستخدم جسمنا في إيه.
هنعمل إيه؟
- هنبتدي بإننا نسأل ولادنا شوية أسئلة زي دي:
حد يعرف جسمنا في إيه؟
(يد - عين - رجل ... إلخ)
- تعرفوا إننا مسئولين عن الحاجات اللي أجزاء جسمنا بتعملها؟
تيجوا نعرف إزاي...؟
- هنسمي كل جزء من جسمنا وهنبتدي نفكر معاهم ممكن الجزء ده يعمل إيه عشان يبقى مسئول.
- هعرض تحت شوية أمثلة للمساعدة وأنتوا ابدعوا مع اولادكم في الباقي 😊
- اليد ممكن:
- نساعد حد بها
- نطبطب على حد بها
- ناكل بها
- نوضب بها
- ننضف بها نفسنا
- الفم ممكن:
- ناكل به أكل صحي
- نقول به كلام حلو لحد
- نتكلم بصوت كويس
- العين ممكن:
- نتفرج بها على حاجات كويسة
- نقرأ بها
- نريحها شوية
ده طبعاً على سبيل المثال لا الحصر. الوسيلة دي حلوة أوي إن الأولاد تتعرف على أو تراجع أجزاء جسمها وكمان بعدين ممكن نفكر ولادنا إحنا كنا قلنا الجزء ده مسئول عن إيه لما يرفضوا يكملوا أو يعملوا مسئولياتهم.