دايماُ كنت بسأل نفسي أنا ليه كنت بحب حصص الموسيقى والرسم ؟ وليه كنت بتنكد لما بتخلص وأرجع لأسباب قيام حملة فريزر و قصب السكر بتاع نجع حمادي؟ مكنتش مركزة في السبب ساعتها بس لما كبرت فهمت.

دايماُ كنت بسأل نفسي أنا ليه كنت بحب حصص الموسيقى والرسم ؟ وليه كنت بتنكد لما بتخلص وأرجع لأسباب قيام حملة فريزر و قصب السكر بتاع نجع حمادي؟ مكنتش مركزة في السبب ساعتها بس لما كبرت فهمت.

فهمت إن حصص الرسم والموسيقى كانوا الفرص الوحيدة في المدرسة إني أبقى نفسي..إني أعبر عن اللي جوايا بقدر من الحرية وبشكل إبداعي.. إنه يبقى لي حرية التصرف في المعطيات اللي بأخذها ومطبقهاش زي الكتاب مابيقول ، كانت الحصة الوحيدة اللي مش بحس فيها إني ترس في عجلة أو جزء من كل بيحفظ ويردد كلام مش لامسه.

لو كانت الحصص التانية فيها نفس القدر من الحرية بتاعة حصة الرسم كانت تجربتي في التعليم شكلها هيختلف كتير،ولكن المتعارف عليه عن التعليم في ثقافتنا، إن لكل مقامٍ مقال وإنه مفيش هزار في الجد… العلم والدراسة حاجة والفن والغنى والإبداع دول حاجة تانية خالص وعشان كدة، أنشطة التعبير الإبداعي في أغلب المدارس المصرية بتمارس بشكل منفصل وباهتمام أقل من المواد “الأكثر أهمية”.

ولكن الحقيقة إن لا المواد العلمية جامدة ومنفصلة عن الحياة زي ما نظام التعليم بيبينها ولا الفن والتعبير الإبداعي تافه وملوش تطبيق عملي في حياتنا، الأصل إن كل حاجة متعلقة ببعض و إن الفن والعلم بينهم تكامل مش تنافر…العلم والفن بمنتهى البساطة أصلهم الإنسان وخبراته ومتطلباته اللي كلها نابعة من نفس الاحتياج وبتعمل لنفس الهدف وهو نهوض الإنسان بنفسه وعيش حياة ليها طعم و معنى …

الموضوع كله أصله بسيط و الإبداع الفني له مكان في العلوم والمواد الأدبية، ومن أمتع وأنفع الأساليب اللي ممكن المعلم يطبقها في فصله هي إنه يدي مساحة التعبير الإبداعي للطلبة داخل الفصل، المدرس هيقدر يخاطب جميع أساليب التعلم المرئية والحركية والسمعية عند المتعلمين،والطالب  مش بس هيفهم الدرس وهيتسجل في ذاكرته بعيدة المدى فمش هينساه أبداً، ده كمان هيستفيد منه في جوانب تانية في حياته، وهيساعده على اكتشاف نفسه ومواهبة وهينمي شخصيته.

عايزين أفكار؟ كملوا قراية

الكيمياء وفن الطبخ

فكرة الكيمياء بعناصرها المجردة ومفاهيمها المعقدة ممكن تتبسط عن طريق نشاط عملي في المطبخ، ممكن ندي فرصة للطلبة يطبخوا أكلة بنفسهم ويتعلموا التفاعلات الكيميائية اللي حصلت لكل عنصر علشان الأكل يتحول من صورته الخام لحالة السواء، مهم إن الطالب يستوعب الهدف من المادة  وإنه يكون له مساحة يبدع فيها ، يعني اللي بيميز طباخ شاطر عن طباخ مش شاطر هو فهمه للتفاعلات الكيميائية اللي بتحصل في طبخته و لمسته الإبداعية في الطبق اللي بيقدمه.

لو انتي مدرسة صف ابتدائي أو إعدادي ممكن تصممي حصة عن التفاعلات الكيميائية اللي بتحصل للبسكوت (الكوكيز) علشان يتحول من عجينة طرية لمادة ناشفة ومقرمشة،ممكن في الأول تدي فرصة للطلاب يضيفوا الإضافات اللي يحبوها للكوكيز مهما كانت غريبة و بعد كدة يدخلوا إبداعاتهم الفرن ويتفرجوا على العجينة وهي بتقب ويفهموا إن ده بسبب إن درجة حرارة الفرن بتخلي المية تتبخر من خلال العجينة  وبالتالي العجينة تقب،و كمان البيكينج صودا و البكبنج باودر بيتحولوا لثاني أكسيد الكربون اللي بيخلي البسكوت ينفش أكتر. ده مجرد مثال من آلاف الأمثلة اللي ممكن تنفذوها في فصولكم.

الرياضيات والرسم

كتير من الطلبة مايعرفش لزمة مفاهيم الرياضة المجردة في حياتنا والمناهج التعليمية مش بتفهم علاقة الرياضيات بالواقع أوسبب دراستنا ليها ولكن من خلال نشاط فني بسيط ممكن نبين للأولاد علاقة مادة الرياضيات بالجمال والفن في حياتنا ونفهمهم الدرس بشكل مختلف وجذاب وفي نفس الوقت نتيح لهم الفرصة إنهم يعبروا عن نفسهم.

مثلا، درس النسبة والتناسب ممكن يتحول من مجموعة أرقام ومفاهيم مجردة لحصة إبداع فني، كل ما على المعلم هو إنه يلفت نظر الطلاب لأن  النسب الرياضية والأبعاد هي من أهم ما يميز الجمال عن القبح ، وإن الأشكال والأنماط المتكررة اللي بتميز فن العمارة الإسلامي أساسها علاقات ونسب رياضية، واللي بيميز الوجه الجميل عن وجه مش بنفس الجمال هو النسب اللي ما بين الملامح. ممكن يعمل أنشطة فنية ورسومات بتوضح كيفية رسم زخارف بنسبة 3:2 أونشاط  لرسم الوجه والنسب بتاعته أو استخدام مقياس رسم وممكن كمان اللي بيدرس حساب المثلثات يعلم الأطفال الكسور والأشكال الهندسية وعلاقتها بالمساحات بالشكل ده.

اللغات والأغاني 

ليه أغاني الإعلانات بتلزق في دماغنا ومش بنعرف ننساها؟ علشان المعلومة لما تكون ملحنة بنفتكرها أحسن، نفس الشئ بينطبق على اللغة، لو عايزين نتعلم تركيبات ومفردات لغوية بشكل أسرع وأحسن، سماع الأغاني الأجنبية وتكرارها هو أحسن طريقة ، لو عندك مجموعة من المفردات الجديدة ممكن تعمل نشاط تأليف أغاني من المفردات دي والتركيبات اللغوية كمان، ممكن تقسم الفصل ل 3 أو 4 مجموعات وداخل كل مجموعة يكون في طلاب مسؤولين عن التلحين وطلاب يشتغلوا على الكامات والقافية ,النشاط ده هيحرك طاقاتهم الابداعية ويعلمهم في نفس الوقت. ممكن كمان إذا ماعندكش وقت تشغل أغاني أجنبية فيها الكلمات أو التركيبات اللغوية اللي عايز تعلمهالهم وتسمعهالهم في الفصل ولكن النشاط الأول  هيكون مؤثر أكتر لأنه هيسمح لكل طالب إنه يعلم نفسه بنفسه من خلال تجربة إبداعية.

التاريخ والتمثيل

أسهل وأمتع نشاط ممكن مدرس التاريخ يطبقه في الفصل إنه يحول حدث تاريخي أو مجموعة أحداث لدراما مسرحية. النشاط ده هيدى فرصة للطلبة يندمجوا مع الشخصيات التاريخية بإنهم يحطوا نفسهم في مكان الشخصية، وهينمي عندهم الخيال والتفكير النقدي لأنه هيديهم مساحة لتخيل تفاصيل الشخصية التاريخية وطريقة كلامها ومناقشة المشاكل اللي بتقابلها، حصة التاريخ اللي كتير من الطلبة بيشوفها مملة  ممكن تتحول إلى متنفس لأفكارهم ومشاعرهم وتضيفلهم ثقة بالنفس وتطور قدرتهم على الإقناع وتعمق معاني التعاون والتواصل وتثري شخصياتهم بشكل عام، النشاط التمثيلي مش بس هيخرج قدراتهم الإبداعية، هو كمان هيزيد من فهمهم للدرس نفسه ويساعدهم إنهم يحبوا المادة وده كله لمجرد إنهم طبقوا أفكار بشكل عملي وممتع .التمثيل الدرامي هو أكثر نشاط بيشجع على التعاون والتواصل وهم من أهم مهارات القرن الواحد والعشرين وبيحضر شباب النهاردة لمستقبل أهم ثرواته هي الثروة البشرية.

منى عبد المنعم

عملت منى بمجال التدريس بالجامعة ومجالي الكتابة والترجمة، ومجال صناعة العلامات التجارية قبل أن تتجه للتسويق الرقمي. التحقت منى بمؤسسة علمني كمتطوعة لمدة عامين ثم انضمت لفريق العلاقات العامة كمسؤولة إنشاء المحتوى الرقمي ثم مشرفة التسويق الرقمي. في المرحلة الجامعية، درست منى الأدب الإنجليزي بجامعة القاهرة ثم حصلت على درجة الماجستير في العلوم السياسية من جامعة أبردين باسكتلاندا.