في أهالي كتير بيقابلوني بيكونوا رافضين نظام المدارس اللي بتهتم بالأنشطة أكتر من التعليم وشايفين إن الأنشطة مالهاش أي جدوى.

عايزة أقول لكل أب وأم إن النشاط مش أهم من التعليم ولاالتعليم أهم من النشاط  لأن الإتنين وجهين لعملة واحدة.. بمعني إيه؟

بمعني إن إبنك عمره ماهيتعلم إلا لما يلعب، ويرسم، ويغني، ويعمل تجربة، ويشتغل بإيده، ويجري ورا صحابه … طب في أم هتقول ” لأ !! علي فكرة، أنا إبني بيجيب أحسن الدرجات رغم إن مدرسته مبتهتمش بالنشاط ولا أنا نفسي بهتم بالنشاط.”  أحب أقول لحضرتك إبنك فعلاً بيجيب أحسن الدرجات وده معناه إنه بيحفظ لكن مش بيتعلم .. في فرق كبير بين إنه يحفظ وإنه يتعلم ويقدر يطبق في حياته العملية.

 في فرق بين إنه يعرف نظرية فيثاغورس وبين إنه يستخدمها في معرفة قياس أجزاء معينة من الأوضه بسهولة ومن غير أدوات،  وفي فرق بين إنه يحفظ نظريات علوم وهندسة وبعدين ينساها وإنه يستخدمها كل يوم ويعتمد عليها وتكون بتسهل حياته، وفي فرق ما بين إنه يحفظ كتب العربي ويجيب في التعبير الدرجة النهائية وبين إنه يقدر يعبرعن نفسه صح ويقول اللي جواه بطريقة مظبوطة.

عشان يحصل كل ده لازم يتعلم  من خلال الأنشطة، يعني في الوقت اللي فيه الطفل  بيلعب بالألوان وإحنا فاكرين إن ده وقت ضايع والطفل بيبهدل نفسه الطفل بيكون بيكتشف تركيبات الألوان ولما بيشتغل بإيده عمره مابينساها، والوقت اللي الطفل بينفخ فيه بالونة ويرجع يطيرها هو نفس الوقت اللي بيكتشف فيه قوة ضغط الهوا وسر البراشوت، والوقت اللي بيروح فيه المسرح ويجرب يعبر عن نفسه هو نفس الوقت اللي بيتعلم فيه أصول اللغة وإزاي يستخدمها،ده غير المهارات اللي ممكن يكتسبها لما بيلعب مع أصحابه في مجموعات ودي بتأهله للعمل بعد كده ومهارات التعامل مع فريق وأهمية دوره كعضو في فريق.. كل ده بيتعلمه من خلال الأنشطة.

 عشان كده، لو مدرسة أولادك بتهتم بالأنشطة إعرف إن إبنك هيكون متميز عن غيره الـ٢٠ سنة اللي جايين ولو المدرسة مبتهتمش بالأنشطة حاولوا تهتموا بيها إنتم في البيت.

نعمة عطية

نعمة عطية هي أخصائي تنمية مهنية بمؤسسة علمني حاصلة على دبلومة الإرشاد النفسي وتعديل السلوك وصعوبات التعلم، وغير شغلها مع علمني، نعمة متخصصة في تصميم الألعاب والأنشطة التعليمية للأطفال والكبار.