مع بداية موسم الصيف، أحب أشارككم، بالنيابة عن فريق مكوك، ببعض الأساليب المبتكرة والبسيطة لأنشطة تعليمية هتعجب طفلك وتشغله خلال الأجازة للصيفية.
في مكوك، بنعرض الأطفال لتجارب تعليمية بأشكال مختلفة، ولكن هنركز في المقال هنا علي أسهل و أبسط الأفكار اللي لو نفذتيها مع الطفل هتنمى تفكيره وتقوى علاقتك به في شهور الأجازة.
الفكرة هى إن الأنشطة تبقى على هيئة أسئلة مختلفة، كل سؤال منهم يبني على التاني طول فترة الأجازة، فمع نهاية الأجازة يكون الطفل أخد دورة تعلم شاملة اكتسب منها سلوكيات و مهارات مختلفة .
هركز على ٥ مهارات تشتغلي عليهم و تنميهم في أطفالك خلال الأجازة:
مهارة الملاحظة:
ببساطة، إطلبي منه إنه يلاحظ الحاجات اللي حواليه ويركز علي التفاصيل، وده هيخلى الطفل يتعلم يلاحظ ويدرك الأحداث والأشياء بشكل أحسن، وده أساس مهارة التساؤل. الأطفال بيلاحظوا بالفطرة. إللى عليكي تعمليه إنك تخليه يدرك مهارة الملاحظة إللي عنده علشان دى الخطوة الأولى اللى هنبنى عليها باقى المهارات.
مهارة التساؤل:
إنك تسألي طفلك “ليه” هو أول خطوة لتنمية فضوله وتوجيهه لاكتشاف ما وراء أي فكرة أو مفهوم قد يبدو بديهي أو حقيقة مطلقة.
مهارة البحث:
علشان يعرف اجابات أسئلتك هيتعلم ازاى يدور و يلاقي حلول منطقية وقابلة للتطبيق.
مهارة التحليل:
التحليل هو الخطوة اللى بتيجي بعد خطوة البحث وجمع المعلومات، وده معناه إنه يحول المعلومات اللى عرفها لأفكار يقدر يشرحها.
مهارة التأمل أو الاستنباط:
دى واحدة من أهم المهارات اللي الطفل محتاجها عشان يتعلم وتفكيره يتطور ويفهم حقيقة الأشياء وعلاقتها ببعض.
طيب، إزاي ممكن ننمى كل المهارات دى عن طريق ألعاب بسيطة فى البيت؟
سهلة! هنبدأ بسؤال، وسؤال يجيب سؤال.
ودي خمس أسئلة ممكن تبدئي بيهم:
١. إيه أكتر حاجات بتحبها في بيتنا؟
أول سؤال هو “إيه أكتر حاجات الطفل بيحبها في بيته؟” ليه هنسأله السؤال ده؟ علشان السؤال ده ممكن يبدأ مناقشة مفتوحة تقدروا تشاركوهم فيها إنتوا كمان بحاجاتكم المفضلة.
اختاري 5 حاجات وبعدين اكتبى علي لوحة صغيرة الأسئلة الفرعية دى: إيه الحاجة دى؟ معمولة من إيه؟ اتصنعت فين؟ إيه الرحلة اللى أخدتها قبل ما توصل عندنا؟
كل الأسئلة دى المفروض يجاوبها الطفل فى الصيف عن طريق القراية والبحث وسؤال الناس وبعدين المفروض يكتب أي حاجة توصل لها أول بأول علي حيطة أو لوحة حائط مخصصة قبل نهاية الصيف. و بكدة هيكون بنى قدر كويس من المعرفة عن أصل الأشياء.
٢. إيه أكتر ٤ حاجات بستخدمهم؟
خلي طفلك يكتب أو يرسم الأربع أدوات دول واستخدماتهم علي سبورة أو حيطة أو حتى ورقة كبيرة.
الخطوة اللى بعد كدة إنكم ترجعوا بالزمن. اسأليه يا تري الأدوات دى كانت موجودة من ١٥ أو ٥٠ أو ٢٠٠ أو حتى ١٠٠٠ سنة؟ إيه اللى كان ممكن يكون موجود مكانهم لو ماكانوش موجودين؟ الأسئلة دى بتساعد الطفل إنه يفهم إزاى الحاجات بتتطور عبر الزمن وإزاي احتياجات الإنسان بتتغير وبتتقدم.
٣. إيه الأماكن اللى روحتها في مصر؟
اطبعى خريطة مصر وخليه يستخدم رموز مختلفة عليها:
- مربع للأماكن اللى زارها
- دايرة للأماكن اللى يحب يزورها
- مثلث للأماكن اللى يعرف عنها معلومات
- علامة X للأماكن اللى حابب يعرف أكتر عنها
الطفل ممكن بعد كدة يقرا عن الأماكن اللى مايعرفهاش ويتكلم عن الأماكن اللى عارفها أو اللي راحها، وده هيساعده إنه يكون وعى جغرافى عن المكان اللى عايش فيه، والمكان اللى أصله منه وهكذا.
٤. ليه السما زرقا؟
استوحينا فكرة إنك تسألى الطفل أسئلة مفتوحة عن حاجات بديهية من مشروع علامة استفهام:
- ليه السما زرقا؟
- ليه الشمال اتجاهه لفوق؟
- ليه الدم أحمر؟
ممكن تسألى سؤال من دول كل أسبوع أو شهر و تتحديه إنه يلاقى إجابة السؤال. شجعيه هو كمان إنه يسأل أسئلة عن حاجات مفكرش في إجابات ليها قبل كدة.
٥. إيه اللي بيحصل الصيف ده؟
سجلي الأحداث المهمة اللى بتحصل الأجازة دى: تجمع صحاب، أوعيد ميلاد، أوأكلة حلوة مثلاً:
- ناقشيه في اللى حصل وعن إحساسه فى كل حدث من دول وسجلي المناقشة فيديو؟
- لما يخلص كلام، اسأليه: قابلت حد جديد؟ اتعلمت حاجة جديدة؟ ممكن نعيد اللى حصل تانى؟
فكرة تانية هي إنكم تحولوا إجاباته لأجندة فيها صور وكلام عن أكتر أحداث حبها، وعن أحاسيسه ومشاعره وعن التجارب والأصحاب الجداد اللي عملهم.
أغلب الأسئلة دى هتديكي فرصة إنك تشتغلي مع طفلك على تطوير مصادر تعليمية خاصة بيه هو وأوراق مسجل فيها تأملاته واستنباطاته تساعده في الاستكشاف بعد كدة.
بننصحك إنك تستخدمى ألوان كتير ومواد معاد استخدامها وصور لما تقدرى عشان تزودى من إثارة التجربة. مع الوقت، هتستغربي من الأسئلة الجديدة المدهشة اللى بيسألها طفلك ومن التجارب الكتير اللى هتعشيها معاه. مش بنبالغ لما نقول إن بعد ما الأنشطة دى تخلص، طفلك هيغير طريقة تفكيره وعلاقتك بيه هتبقى أقوى بكتير. استمتعوا!