علمني عندها ٤ قيم أساسية بتطبقهم في المؤسسة. القيم دي هي تمكين الأحلام والمسئولية والمرح والتعلم التكيفي. و عشان إنتم جزء من مجتمع علمني، قررنا نحول القيم دي لأنشطة عشان تعلموها لأولادكم في البيت. قمنا بالتعاون مع Peekabook اللي هتاخد كل قيمة وهتقلبها لأنشطة تتعمل على مدار ٥ أو ٧ أيام. هدف الأنشطة هو فهم القيم ومناقشتها وممارستها في الحياة اليومية. الفئة العمرية اللي هنستهدفها الفترة دي هم الأطفال من سن ٤ لـ ٦ سنوات.
النشاط الأول:
المدة: 30 دقيقة الموقع: أي مكان مستوى النشاط: هادئ الفئة العُمرية: 4 – 6
الأدوات
- ورق A4
- مقص
- سوليتيب
- طباعة "ارسم المسئولية"
- أقلام
- علبة ألوان
إيه هي المسئولية؟
المسئولية هي إن كل واحد فينا مطلوب منه شوية حاجات لو عملها أو معملهاش، هيحصل شوية حاجات (أو هيحصل نتيجة) ممن تبقى حلوة أو وحشة.
هنعمل إيه؟
نشاط بازل المسئولية
- هنكتب كلمة "المسئولية" على ورقة بخط كبير، و نقصها بأشكال مُختلفة، بعدين نلخبطها في بعض.
- بعدين، هنجمع الأولاد و هنطلب منهم تجميع البازل و لصقها في بعص.
- بعد ما يجمعوها هنبدأ المناقشة.
المناقشة
بعد النشاط، خلوا الولاد يفكروا في النشاط ودي شوية أسئلة ممكن نستخدمها (دي مجرد أسئلة مساعدة ممكن تستخدموا أسئلة تانية):
- إيه رأيكوا في اللعبة؟
- تفتكروا إيه الكلمة اللي مكتوبة؟
ملحوظة: الولاد الصغيرة (4 سنين) في منهم هيبقى عارف الحروف فا ممكن نفكرهم بيها و نحاول نساعدهم في نطقها لحد ما يكونوا الكلمة. و في أطفال مش هيبقوا لسة عارفين الحروف، دول هنقرالهم الكلمة و صباعنا بيعدي على كل حرف عشان يعرفوا شكلها و دي حاجة مهمة في إكتساب المهارات و القيم.
- حد يعرف معناها؟
ملحوظة: لو الإجابة آه، هنسمع التعريف و ناخد من كلامهم و ناكد عليه و نقول التعريف اللي فوق و نكمل اللأسئلة اللي جاية. لو الإجابة لأ، يبقى هنقول التعريف اللي فوق " المسئولية هي إن كل واحد فينا مطلوب منه شوية حاجات لو عملها أو معملهاش، هيحصل شوية حاجات (أو هيحصل نتيجة) ممن تبقى حلوة أو وحشة.
- طيب، تفتكروا لو محدش كان اشتغل و جمع البازل دي كان إيه اللي هيحصل؟
ملحوظة: لو الإجابة إن مكناش هنعرف دي إيه أو إن مكنش هيبقى عندنا نشاط أو أي إجابة شبيهة، هنقول "بالضبط، اللي إحنا عملناه ده شبه المسئولية. كل واحد مننا كان مطلوب منه/كان مسؤول إنه يجمع البازل و عشان كلنا اشتغلنا عليها، قدرنا نجمع البازل... لو كانت الإجابة منعرفش، هنبتدي نساعدهم يجاوبوا، زي مثلاً إننا نسألهم "تفتكروا كان هيبقى عندنا بازل؟ طب كدة كنا هنبقى مبسوطين؟ وهكذا.
- مين يقدر يقول لي الحاجات اللي هو مسؤول عنها أو مطلوبة منه في البيت؟
ملحوظة: لو مش عارفين، برضه هنساعدهم، زي إننا ندي أمثلة لحاجة هم مسؤولين عنها و نسألهم "إيه تاني؟" و هكذا لحد ما نتأكد إنهم فهموا.
نشاط رسم المسئولية
- هنطبع ورقة "ارسم المسئولية".
- الورقة مكتوب فيها كلمة "المسئولية" و جنبها مكان يرسموا فيه.
- مطلوب منهم يرسموا فيها شكل المسئولية بالنسبة لهم عامل إزاي (بدون تدخل منكم، حتى لو اللي مرسوم ده مش مفهوم بالنسبة لك).
- لما يخلصوا، ممكن كل حد يشرح هو رسم إيه.
