علمني عندها ٤ قيم أساسية بتطبقهم في المؤسسة. القيم دي هي تمكين الأحلام والمسئولية والمرح والتعلم التكيفي. و عشان إنتم جزء من مجتمع علمني، قررنا نحول القيم دي لأنشطة عشان تعلموها لأولادكم في البيت. قمنا بالتعاون مع Peekabook اللي هتاخد كل قيمة وهتقلبها لأنشطة تتعمل على مدار ٥ أو ٧ أيام. هدف الأنشطة هو فهم القيم ومناقشتها وممارستها في الحياة اليومية. الفئة العمرية اللي هنستهدفها الفترة دي هم الأطفال من سن ٤ لـ ٦ سنوات.
المسئولية
(اليوم الثاني)
المدة: 30 دقيقة
الموقع: أي مكان
مستوى النشاط: متوسط
الفئة العُمرية: 4 – 6
الأدوات: لا شئ
إيه هي المسئولية؟
المسئولية هي إننا نفكر قبل ما نعمل أي حاجة، وإننا نبقى جاهزين للي ممكن يحصل بسبب الحاجات اللي عملناها.
النشاط
تمثيل مواقف
التمثيل والحكايات من الحاجات اللي بتساعد الأطفال جداً على إنهم يربطوا المواقف بحياتهم اليومية ويسترجعوا المواقف التمثيلية وياخدوا القرار الصح.
- هنبتدي إننا هنمثل معاهم شوية مواقف برد الفعل الغلط بتاعها
-
- و بعدين هنحاول نفكر معاهم إذا كانت ردود الأفعال دي صح و لا غلط؟ و كانت إيه النتيجة بتاعتها؟ و إزاي ممكن نتحمل مسئوليتها، و نخليها صح و نعيد تمثيلها و نشوف نتيجتها.
المواقف كالآتي:
- و أنت بتلعب وقعت حاجة في البيت و اتكسرت. قررت إنك بدل ما تقول اللي حصل، هتقول إنك لقيتها كدة أو إن حد تاني هو اللي كسرها.
- طلبت من ماما/بابا حاجة و قالوا "لأ". بدأت تعيط وتصوت وتزن.
- أخوك/أختك بيلعبوا باللعبة بتاعتك وأنت عايزها. قررت تروح تخطفها منهم.
ممكن تزودوا أي مواقف تانية بتتكرر مع أولادكم. الطريقة دي هتخليهم يسترجعوا مواقف لما كانوا بيعملوا رد الفعل الغلط، أهم حاجة من غير لوم، نناقش ونسأل ونحاول نطلع بأفكار لطرق تانية لحل المسكلة اللي بنواجهها بشكل إيجابي ومسئول. طبعاً، بعد النشاط ده السلوك مش هيتغير فجأة، لكن هتبقى فرصة حلوة إن لما يحصل الموقف نهدى ونفتكر مع بعض لما اتدربنا عليه وإحنا بنمثل.