بحكم شغلى والأنشطة التطوعية اللي بشترك فيها، كثير كنت بشوف ناس شكلها مش كبير بس كلامها وتصرفاتها بتدل على وعي وحكمة وخبرة كبيرة قوي، ولما كنت أحب أتأكد أكثر كنت بسألهم.. إنت عندك كم سنة؟!
وقتها كنت بتأكد إن عمرنا مش بيتحسب بالسن قد ما بيتحسب بالحاجات اللي بنعرف نعملها، وفهمنا للعالم وكم اللي بيضيفهولنا وبنضيفه له.
فلو هتأنتخ؟ هتخسر كتير أوي…
السر في نضوج الإنسان بيكون في كثرة التجربة مش كبرالسن، وكطالب أو طالبة جامعة ده أنسب وقت تكتشفوا فيه مهاراتكم وشخصياتكم من كل الجوانب ، مش هتعرف قيمة نفسك واللي تقدر تحققه غير لما تجرب، وكتر التجارب بيكبرنا وبيختصر أعمار، وبيخلينا نفهم أكثر، ومرنين أكثر، وبنتعامل أحسن، وبنعرف نكون علاقات قوية ونساعد ناس محتاجة مساعدتنا وكمان بيساعدنا نحط نفسنا في طريق الناس اللي ممكن تساعدنا ونتعلم منهم.
وفي ناس مجرد كلامنا معاهم تجربة في حد ذاتها، لو نزلت أي جامعة أو مدرسة هتلاقي أنواع مختلفة من الطلاب، منهم هتلاقي مجموعات من الطلبة مشغولة كدة ولها booth وبتعمل في صمت، لو قربت منهم أكثر هتشوفهم بشكل مختلف، ولو سمعت منهم أكيد هتخرج بتجربة إنسانية مختلفة وتفهم أكتر عن حياتهم ، وجايز تقرر تبقى منهم وعشان كدة قررت أديلكم نظرة أقرب لحياة الطلاب دول وحاورت مجموعة من الناس اللي شاركت وبتشارك في أنشطة طلابية، ولقيت بينهم سمات مشتركة..
كريم
ثانية ألسن، جامعة عين شمس، نشاط X Volunteer
احكيلنا عن تجربتك في الأنشطة الطلابية
بداية دخولي X Volunteer في الجامعة كان في سنة أولى كلية واللي عرفت عنه بالصدفه ، ففكرت أجرب وقدمت في نشاط لل Fundraising وعملت انترفيو واتقبلت ومن هنا كانت البداية.
مشاركتي خلال السنتين اللي فاتوا فرقت جدا في شخصيتي، كنت قبل كده هادي جدا وكان بيبقى صعب عليا أتعرف على ناس جديدة، ولأن جزء من مهامي إني أعرض الأنشطة اللي بنعملها على شركات وأحاول أجيب ممولين للبرامج بتاعتنا وأتفاوض معاهم، بقيت بقدر أكون علاقات كثير، وأقدر أحدد اللي قدامي محتاجه وأوصل معاه لاتفاق مناسب.
كمان بقيت أتحط في مسئوليات كثير، ونجاحي فيها بيحسسني بقيمة اللي بعمله خصوصا إن الجو العام في النشاط الطلابي بيكون زي بيئة العمل بالظبط فبخوض تجربة الشغل وخبرته قبل ما اتحط فيها، يعني مثلاً لما بدأت كنت Fundraising Member ودلوقتي بقيت Head وده خلاني أخوض تجربة إني أكبر وأتطور جوه المكان، وأحس بنجاحي وأقود فرق وأساعدها في حل مشاكلها.
تفتكر إيه اللي بيجمع الناس اللي بتشتغل في أنشطة طلابية؟
اللي بلاحظه دايما فيهم إنهم مش ناس عادية..اللي بيجمعهم دايما رغبتهم في التعلم، وإنهم يتعلموا بنفسهم ويعتمدوا على نفسهم في تحقيق أهدافهم وحبهم للي بيعملوه، واستعدادهم انهم يعيشوا تجربة حقيقية تساعدهم إنهم يطوروا شخصياتهم.
إيه التحديات اللي بتواجهوها وبتتعاملوا معاها ازاي؟
كتير بتواجهنا مشكلات في التمويل وبنحتاج دعم من الجامعة، وكتير بنحاول نعتمد على نفسنا في التمويل وده بيبقى تحدي كبير بالنسبة لطلبة دخلها قليل، بنحاول نحل مشكلة التمويل من خلال عرض الأنشطة بتاعتنا بطريقة كويسة وإننا نلاقي sponsors ونكون صبورين مع سياسات الجامعة ونعرض على المسئولين في الجامعة أهمية اللي بنعمله، وقد إيه بيساعد الطلاب انهم يتعلموا بشكل عملي.
ضغط الشغل مع المذاكرة وضغوط حياتنا الشخصية بتبقى تحدي في أوقات كثير خصوصاً إن ناس كثير بيكونوا مش مقتنعين في البداية بأهمية اللي بنعمله، لكن مع الوقت قدرت أتعامل مع كل ده واحقق التوازن بينهم ومباقتش بحس بالضغط.
ايه أنواع الخدمات اللي بتقدموها؟
بنحاول نساعد الطلاب تتعلم أحسن ونضيق الفجوة بين تعليم الجامعة وسوق العمل من خلال تدريبات بنقدمها للطلاب عن ريادة الاعمال، وبعد التدريب بيخرج كل فريق من الطلاب بفكرة مشروع بينفذه على أرض الواقع.
كمان في فريق بيكون مسئول عن الأعمال الخيرية واللي بيساعد الناس في المناطق الفقيرة كنوع من الخدمات اللي بنقدمها للمجتمع.
إيه اللي بيخليك تنزل وتشتغل رغم إنك غالبا مش هتاخد مقابل مادي؟
شغلي في الأنشطة الطلابية بيساعدني أكسب خبرة كبيرة، وبيطورمهاراتي وبيفتح فرص وعلاقات أكبر قدامي وخصوصا كوني طالب خبرته في الشغل مش كبيرة، و الخبرة دي مهمة جدا ولازم يكون لها ثمن.
سارة
تالتة تجارة، جامعة عين شمس، نشاط Enactus
إيه،في رأيك، اللي بيجمع الناس اللي بتشتغل أنشطة طلابية؟
التغيير وإنه يبقى عنده فكرة ،كل واحد نفسه يغير من نفسه والمجتمع اللى حواليه و يطوره من خلال فكره عنده وبدايتها إنه يبتدى يغير من نفسه الأول عشان الكل يتغير ويعلم الناس فكرته وينشرها وينفذها.
إيه أنواع الخدمات اللي بتقدموها؟
ايناكتس هى منظمه عالميه موجوده في أكتر من ٣٦ دوله و ٥٠ جامعه فى مصر هدفها التنميه المستدامه في المجتمع من خلال مشاريع تخدم المجتمع عن طريق مشاريع صغيرة Startups والمشاريع دى بتدخل مسابقات محلية على مستوى مصر في كل الجامعات واللى بيكسب بيتأهل لمسابقة دولية اللى السنه دى هتبقى في لندن إن شاء الله
إيناكتس بتتضمن كذا لجنة أو committee و هما: Projects , Presentation, Media, HR, Treasury, PR, FR, Logistics
إيه اللي بيخليكي تنزلي وتشتغلي رغم إنك غالبا مش هتاخدي مقابل مادي؟
هو مش غالبا هو فعلا مفيش مقابل مادى بناخده و اللى مخلينا كده حبنا للمكان و إيماننا و انتماءنا و شغفنا بفكرتنا فى المكان اللى بنشتغل فيه وإننا نوصل لهدفنا .
إيه اللي استفدتيه من خلال شغلك في الأنشطة دي؟
شفت الدنيا من منظور تانى و ده عمل تغيير و اختلاف في طريقه تفكيرى وحياتى كلها وحياه ناس تانيه كمان، أخدت خبره كبيره جدا سواء في حياتى الشخصيه أو العمليه وصعب إن الشخص ياخد فرصه زى دى أو إنه يتعلمها ويجربها في أى مكان.
إيه التحديات اللي بتواجهك في الشغل مع الأنشطة الطلابية؟ بتتعاملي معاها ازاي؟
أكبر تحدى لينا فى Enactus هو المنافسين، وبنتعامل معاه بإننا نركز في هدفنا وإننا نشتغل على مشاريعنا أكتر ومانزهقش من إننا نجرب كل حاجه و نشوف هى محتاجه إيه و نبذل أقصى جهدنا فيها عشان نكسب.
وكدة أو كدة كل يوم مليان تحديات و أهم تحدى هو إنك توصلي للي انت عايزاه وميزة الأنشطة الطلابية أصلاً إنها بتعلمنا إزاى نعرف نعدى أى تحديات بتواجهنا.
إيه اللي محتاج يكون في شخص علشان ينضم لكم؟
شغف و إنه يكون عايز يتعلم .
لو تعرفي طالب جديد تنصحيه بإيه؟
متضيعش سنين الكليه في الدراسه والكليه بس ، كل أحلامك و اللى نفسك تحققه في إيدك انت، وانت طالب عندك فرصه ووقت إنك تتعلم و تجرب و تاخد خبره فى مجالات كتيره و ده هيتوفرلك سواء في الأنشطه التطوعيه بكل انواعها أو في تدريب في شركات ومؤسسات بره الجامعه .
تفتكري إيه اللي محتاج أي إنسان يتعلمه وممكن يلاقيه في الأنشطة الطلابية؟
التجربه و الخبره، إنه يجرب كل حاجه وده هيخليه يكتسب خبره في مجالات كتير ،وكمان إنه يعرف هو عايز إيه وهدفه إيه و ده هيساعده يعمل اختلاف حقيقي في حياته و في حياه الناس.
بتحلمي بإيه؟
إني أسيب بصمه كويسة في كل شخص يعرفنى وأعمل تغيير و اختلاف في المجتمع .
عبد الرحمن
رابعة فنون تطبيقية، جامعة ٦ أكتوبر، نشاط Enactus
إيه اللي بيخليك تشتغل وانت مبتاخدش مقابل مادي؟
اولاً لأني بحب اشتغل واتعلم،وببقى عارف إنه أكيد في كل مرة بتعلم حاجة جديدة هتخليني في المستقبل آخد المقابل المادي ده بس من مكان تاني، يعني Enactus هي مصدر تعلم بالنسبالي كأني باخد كورس كدة بس مش كورس في حاجة واحدة لا ده في شغل الديزاينز وفي التعامل مع الناس وفي الشغل تحت ضغط وفي التعرف علي ناس جديدة.
إيه اللي استفدته من شغلك في الأنشطة ؟
علي الرغم من إن أغلبها حاجات اجتماعية أكتر منها تكنيكية بس في مهارات تكنيكية كنت بلاقي نفسي بتعلمها بحكم إن مافيش حد تاني يعملهالنا زي مثلاُ الي اتعلمته في شغل الديزاين هو حاجات بسيطة بس فارقة معايا وأكيد هتفيدني في المستقبل خصوصاً لو اشتغلت عليها شوية كمان.
إيه اللي اتغير في شخصيتك؟
مبقتش اتهته وأخاف لما آجي اتكلم وسط مجموعة كبيرة ، واتعلمت إني ماكرهش شغلي لأنه حتى لو وحش أكيد فيه حاجة ولو بسيطة حلوة والحاجة الحلوة دي هتكبر كل مرة هشتغل فيها وأضيف ليها حاجة جديدة لحد ما تبقي نسبتها أكبر من الوحش.
وزي أي خبرة إنسانية بتساعدنا نتعلم، الأنشطة الطلابية بتساعدنا نعرف نفسنا والعالم اللي حوالينا من خلال الخبرات المختلفة اللي بنمر بيها واللي بتخلينا نعرف دورنا الحقيقي اللي اتخلقنا في الدنيا علشان نحققه وبتساعدنا نحققه بشكل أحسن، فنكبر ونكبر اللي حوالينا.
علي
ثالثة هندسة حلوان، نشاط Enactus
ايه اللي بيخليك تنزل وتشتغل رغم انك غالبا مش هتاخد مقابل مادي؟
إني اكون محتاج أتعلم حاجة جديدة مش عارفها، او إني أنمي حاجة بعرف أعملها وأزود خبرتي ومعرفتي بيها من خلال الممارسة.
إيه اللي استفدته من خلال شغلك في الأنشطة دي؟
قدرت اكون علاقات كثير، وجاتلي فرص سفر ساعدتني أتعرف على ثقافات مختلفة وأكون صداقات جديدة وأقدرأفهم الاختلافات اللي ما بين الناس وبعضها.
ايه اللي محتاج يكون في شخص علشان ينضم لكم؟
إنه يكون عايز يتعلم ويطور مهاراته، ويكون عنده الأساسيات المبدئية للشغل اللي هيدخل فيه، وإنه يكون مستعد للتعلم من خلال الممارسة.
لو تعرف طالب جديد تنصحه بإيه؟
إنه يشارك في أكثر من نشاط وكذا دور علشان يقدر يكتسب مهارات وخبرات مختلفة.
إيه اللي حاسس إنه اتغير في شخصيتك من أول ما بدأت لحد دلوقتي؟
بقيت اجتماعي أكثر، وبقيت أعرف أتعامل بشكل رسمي مع مديري ومؤسسي الشركات وأوسع دايرة معارفي، وأحسن مهاراتي في التعامل مع الناس.
تفتكر إيه اللي محتاج أي إنسان يتعلمه وممكن يلاقيه في الأنشطة الطلابية؟
إنه يجرب وأكيد هيتعلم أي حاجة من خلال النشاط الطلابي لأنه بيكون في بيئة بتساعدة وبتشجعه على التعلم.
بتحلم بإيه؟
عايز أكون رجل أعمال ونفسي أسافر وألف العالم وأتعرف على ناس جديدة من ثقافات مختلفة، نفسي أنقل اللي بتعلمه للناس وأساعد إن بلدنا تكون أحسن.