ساعات كتير من غير مانحس، العلاقة بيننا وبين أولادنا بتتحول لمجموعة من المسؤوليات؛ وحتى وقت اللعب والترفيه بيتحول لمهمة بنخططلها وبتُسند لنا فيها أدوار السواق والطباخ والمساعد وقليل ما بنفكر في نفسنا كشريك في اللعب مع أطفالنا.
لو إنت أم وعندك أطفال سنهم من 4-10 أكيد بياخدوا أجازة طويلة في نص السنة، لكن بتعملي إيه بعد ما بيخلصوا لعب بلعبهم والنادي بيتزهق منه، وأفكارالخروجات بتنتهي والسفريات بتتسافر؟ غالباً بيتبقى عندكوا وقت كتير بتقضوه في البيت، وغالباً ما بيتقضى قدام التلفزيون يا إما التابلت أوالموبايل ولو إبنك أو بنتك من النوع الملول، أكيد الموضوع بيكون صعب.
بدل ما نحول أوقات الأجازة البيتوتية لوقت بنحاول نضيعه لحد ما المدارس تبتدي تاني، ممكن نستغل الوقت ده في تقوية العلاقة بينا وبين أولادنا بمشاركتهم بعض الأنشطة اليدوية وتقضية وقت خالي من أي جري وأوامر أومسؤوليات.
الانترنت مليان أفكار، وإحنا جمعنالك أفكار من أكتر الأنشطة المبدعة اللي هتساعدك على تقضية وقت حلو مع ولادك، تساعديهم من خلالها على اكتشاف حاجات جديدة في نفسهم وتساعدك إنك تتعرفي على شخصياتهم ومهاراتهم بشكل أعمق.
١. تاتوو مؤقت على شكل رسومات من تنفيذ طفلك.
معظم الأطفال بيحبوا يرسموا ويلونوا وكمان بيحبوا التاتو، وموقع Hello Wonderful بيقدم خطوات عمل تاتوهات من تصميم وتلوين أطفالك نفسهم.
المواد المطلوبة:
- ورق تاتو مؤقت، بيكون له ناحية بيضاء وناحية بتلمع ذاتية اللصق (decal paper)
- ورق طباعة أبيض A4 أو رسومات صغيرة مطبوعة بالأبيض والأسود للتلوين
- برينتر وسكانر
الخطوات:
- صمموا الرسومات اللي انتوا عاوزينها أو إطبعي رسومات clip art من على الإنترنت، وممكن تستخدموا المثال ده
- لونوا الرسومات الجاهزة أو إرسموا ولونوا رسوماتكم الخاصة وبعدين إعملولها سكان علشان يكون معاكم نسخة إلكترونية من الرسومات الملونة
- إطبعي الرسومات الملونة على ورق التاتوعلى الناحية اللي بتلمع
- هاتي ورقة تانية من ورق التاتو السادة وشيلي الطبقة البيضاء والزقي الطبقة ذاتية اللصق على ورقة التاتو الأولى اللي طبعتيها. استخدمي مسطرة في الضغط على الورقة علشان تتفادي تكوين فقاعات هواء.
- قصي حوالين الرسومات بشكل دائري أو مربع
- للصق التاتو على الجلد، شيلي الطبقة اللي بتلمع وبعدين حطي وش الرسمة على الجلد مع الضغط على ظهر التاتو(الجانب الأبيض) بسفنجة مبلولة، وبعدين شيلي الطبقة البيضاء اللي في الظهر.
٢. باراشوت لشخصيات طفلك المفضلة
إخترنالك من موقع notimeforflashcards.com باراشوت ممكن يتركب للشخصيات اللعبة الصغيرة ومع إن شكله بسيط وطريقة عمله سهلة جداً، إلا إنه هيعجب ولادك جداً وخصوصاً لو مهاراتهم حركية.
المواد المطلوبة:
- منديل ورقي كبير ملون
- سيلوتيب
- خرامة ورق
- خيوط صوف
- مقص
- شخصية لعبة خفيفة و صغيرة
الخطوات:
- قصي أربع خيوط صوف بطول ٣٠ سم
- افردي المنديل
- الزقي قطعتين سيلوتيب على أركان المنديل (وش وظهر)
- اخرمي خرم مكان السيلوتيب في كل الأركان
- اربطي خيوط الصوف في الحلقات الأربعة واتني الأحرف
- اربطي الخيوط اللي على كل جانب ببعض
- اعملي عقدتين قريبين من بعض في طرف الخيطين المعقودين، دول هيكونوا مكان للدراع
- ركبوا الشخصية ، وابتدوا اللعب!
٣. غوايش من الورق الملون بألوان المياة
عمرك فكرتي إنك تحولي الفن اللي أطفالك بيرسموه لحاجات يلبسوها ؟ موقع picklebums.com بيقدم فكرة مبتكرة لتنفيذ غوايش معمولة من لوحات الأطفال، ممكن أطفالك يستخدموا ألوان المياة و ممكن يستخدموا ألوان الخشب والفلوماستر أوالشمع كحل أكثر عملية.
المواد المطلوبة:
- ورق أبيض
- ألوان مياة أو أي نوع تفضلوه
- مسطرة
- قلم رصاص
- مقص أو كتر
- سيلوتيب أو مشابك ورق (للتثبيت المؤقت)
الخطوات:
- إطلقي لأطفالك العنان وخليهم يلونوا مساحات الورق بالشكل اللي هما حبينه
- قصقصوا الورق على هيئة شرايط مقاس 12سم في 3 سم هتحتاجوا من16 ل 22 شريط لكل غويشة على حسب الحجم اللي محتاجينه،
- طبقوا الشرايط من النص
- شبِّكي كل شريطين متطبقين مع بعض بحيث إن واحد يكون جوه التاني بشكل حرف T
- إرفعي أحد أطرف الشريط الجواني بزاوية ٩٠ درجة
- طبقيه ناحية الشمال بشكل موازي للشريط الخارجي
- اتنيه لأعلى فوق الشريط الخارجي
- إقلبي الشرايط وكرري نفس العملية مع الطرف التاني، ومتنسيش تثبتي الطرف بسيلوتيب أو مشبك ورق
- إطمني إن طفلك فهم الطريقة وضيفي شريط جديد داخل الحلقة اللي كونتوها في أول شريط، إتأكدوا إن طول الجزء اللي هيتكون منه حلقة في الشريط الجديد يكون أكبر شوية من عرض الشريط نفسه
- كرري العملية السابقة، طبقي طرف الشريط للشمال وبعدين لفوق
- دخلي طرف الشريط بعد ما تم تطبيقه داخل الجيب المكون من الشريط السابق
- إقلبوا الشكل وكرروا العملية
- إقلبوا الشكل ناحية اليمين وضيفوا شريط جديد وتكرر العملية من جديد
- استمروا في إضافة الشرايط لحد ما توصلوا لطول الغويشة المطلوب
- بعد الوصول للطول المرغوب، ضموا الأطراف على بعض وشيلوا السيلوتيب أو المشبك من الطرف الأخيرمع تثبيت أول شريط في آخر حلقة اتكونت
- كرروا نفس عملية تطبيق الطرفين على كل جانب وإدخالهم في الجيب
منى عبد المنعم